Android O ရဲ့ အကောင်းဆုံး feature (၉) မျိုး

Google ဟာ အသစ်ထွက်မယ့် Android operating system ဖြစ်တဲ့ Android O ကို developer တွေအတွက် ဖြန့်ချိပေးလိုက်ပါတယ်။ Android O မှာ ပိုကောင်းလာတဲ့ ဘက်ထရီသက်တမ်း၊ notification တွေကို အလွယ်တကူထိန်းချုပ်နိုင်မယ့် လုပ်ဆောင်ချက်များ၊ ဖုန်းနဲ့ tablet အတွက် picture-in-picture mode အပါအဝင် စိတ်လှုပ်ရှားစရာကောင်းတဲ့ feature အချို့ ပါဝင်လာပါတယ်။ ဒါကြောင့် Android O ရဲ့ အကောင်းဆုံး feature (၉) မျိုးကို ဖော်ပြလိုက်ပါတယ်။

(၁) ဘက်ထရီသက်တမ်း

ဘက်ထရီသက်တမ်း ပိုမိုကောင်းမွန်လာတဲ့ လုပ်ဆောင်ချက်ဟာ Android O ရဲ့ အကောင်းဆုံးနဲ့ အကြိုဆိုအခံရဆုံး feature တစ်ခုဖြစ်ပါတယ်။ Android O မှာ iOS လိုပဲ background မှာ ဖွင့်ထားတဲ့ app အများအပြားရဲ့ လုပ်ဆောင်ချက်တွေကို စီမံကန့်သတ်ထားနိုင်ပါပြီ။ ဥပမာအနေနဲ့ Instagram ကို သုံးပြီး background မှာ Google Maps ကို ဖွင့်ထားမယ်ဆိုရင် location service တွေက Maps အတွက် မကြာခဏ update မလုပ်တော့တာကြောင့် ဘက်ထရီအလျင်အမြန်ကုန်ဆုံးတာမျိုး မဖြစ်တော့ပါဘူး။

(၂) Notifications channel များ

Android O မှာ notification တွေကို channel တွေမှာ စုဖွဲ့ထားနိုင်ပါတယ်။ ဒါကြောင့် သတင်းနဲ့သက်ဆိုင်တဲ့ app တွေအတွက် channel တစ်ခု ဖန်တီးထားတယ်ဆိုရင် news channel ထဲက app အားလုံးအတွက် notification settings ထိန်းချုပ်မှုကို တစ်ပြိုင်တည်းလုပ်နိုင်မှာ ဖြစ်ပါတယ်။

(၃) Snooze notification များ

Android O မှာ snooze notification တွေကို ပြုလုပ်ဖို့အတွက် notification တစ်ခုကို လက်ချောင်းနဲ့ slide လုပ်ပြီး ပြုလုပ်နိုင်ပါတယ်။ Snooze လုပ်မယ့်ကြာချိန်ကို ၁၅ မိနစ်၊ ၃၀ မိနစ်၊ ၆၀ မိနစ် ဆိုပြီး ရွေးချယ်သတ်မှတ်နိုင်ပါတယ်။

(၄) Picture-in-picture

ဗီဒီယိုကြည့်နေရင်း အခြား app တစ်ခုသုံးနိုင်တဲ့ လုပ်ဆောင်ချက်မျိုးကို Android O မှာ လုပ်နိုင်ပါပြီ။ ဒီ feature ကို Netflix နဲ့ HBO Now လိုမျိုး video app တွေမှာ တွေ့မြင်ရမလားဆိုတာကိုတော့ စောင်ကြည့်ရမှာပါ။

(၅) Lock screen shortcut များ

Android Nougat ရဲ့ lock screen ပေါ်မှာ Google Assistant ကို အလျင်အမြန်သုံးဖို့အတွက် microphone icon တစ်ခုနဲ့ ဓာတ်ပုံအမြန်ရိုက်ဖို့အတွက် camera icon တစ်ခုပါဝင်ပါတယ်။ Android O မှာတော့ lock screen ကို customize လုပ်နိုင်တာကြောင့် shortcut တွေကို ပိုမိုထည့်သွင်းနိုင်မှာ ဖြစ်ပါတယ်။

(၆) Autofill

Password manager app တစ်ခုကို အသုံးပြုမယ်ဆိုရင် Android O က autofill ကနေတစ်ဆင့် system တစ်ခုလုံး အလွယ်တကူသုံးနိုင်အောင် ပြုလုပ်ပေးနိုင်ပါတယ်။ System တစ်ခုလုံးသုံးနိုင်မယ့် autofill feature အတွက် password manager app ကို ရွေးချယ်သတ်မှတ်နိုင်ပါတယ်။ ဒါဟာ ဖုန်းပေါ်က app တွေအားလုံးမှာအသုံးပြုမယ့် keyboard ကို ရွေးချယ်ပုံနည်းလမ်းနဲ့ အတူတူပါပဲ။

(၇) Wide-gamut color အထောက်အပံ့

ဒီ feature ကတော့ အနာဂတ်မှာ လက်တွေ့စမ်းသပ်နိုင်မယ့် feature ဖြစ်ပါတယ်။ ဖုန်းနဲ့ tablet အသစ်တွေမှာ ပါဝင်လာမယ့် display တွေ တိုးတက်ကောင်းမွန်လာတာနဲ့အမျှ app တွေကဖော်ပြတဲ့ အရောင်တွေရဲ့ တိကျမှုကလည်း ပိုကောင်းလာမှာပါ။

(၈) HiFi Bluetooth audio

အခုအခါမှာတော့ ဖုန်းကနေ အရည်အသွေးမြင့်တဲ့ အသံတွေကို ကြိုးမဲ့စနစ်နဲ့ နားဆင်နိုင်ပါပြီ။ အရည်အသွေးမြင့်မားတဲ့ အသံတွေကတော့ အသံဖမ်းယူမှုအရည်အသွေး၊ အသုံးပြုတဲ့ စပီကာနဲ့ နားကြပ်အပေါ်မူတည်ပြီး ကွဲပြားနိုင်ပါတယ်။

(၉) Keyboard shortcut များ

Android tablet ကို keyboard နဲ့ အသုံးပြုသူတွေအတွက်တော့ သတင်းကောင်းပါပဲ။ Android O မှာ physical keyboard တစ်ခုကနေ အလွယ်တကူသုံးနိုင်စေရန်အတွက် navigation နဲ့ shortcut တွေကို ပြုလုပ်နိုင်ဖို့ developer တွေကို အကောင်းဆုံးထောက်ပံ့ပေးထားပါတယ်။

Ref: CNET
Crd: Internet Journal